Leiðrétting á tillögu stjórnar um greiðslu arðs og meðferð hagnaðar árið 2008. Aðalfundur SPRON hf. fyrir árið 2008 verður haldinn í Borgarleikhúsinu við Listabraut í Reykjavík, miðvikudaginn 27. febrúar 2008, kl. 17:00. Dagskrá: 1. Skýrsla stjórnar um starfsemi félagsins á árinu 2007 2. Lagður fram til staðfestingar endurskoðaður ársreikningur félagsins árið 2007 3. Ákvörðun um greiðslu arðs og meðferð hagnaðar á árinu 2007 4. Tillaga til breytinga á samþykktum félagsins 5. Tillaga stjórnar um starfskjarastefnu félagsins 6. Kosning stjórnar 7. Kosning endurskoðanda 8. Ákvörðun um þóknun stjórnar fyrir næsta kjörtímabil 9. Tillaga um heimild stjórnar til kaupa á eigin hlutum fyrir hönd félagsins 10. Önnur mál Tillögur lagðar fyrir aðalfund SPRON hf. þann 27. febrúar 2008 1. Ákvörðun um greiðslu arðs og meðferð hagnaðar á árinu 2007 Stjórn SPRON hf. leggur til við aðalfund haldinn 27. febrúar 2008, að helmingur hagnaðar eftir skatta, eða 1.643 millj.kr., verði greiddar í arð til hluthafa á árinu 2008 vegna ársins 2007. Arður á hlut er 0,33 krónur. Arðleysisdagurinn er 28. febrúar og arðsréttindadagurinn 3. mars. Hluthöfum er boðið að taka arðinn út að hluta eða að öllu leyti í formi hlutabréfa í SPRON hf. á genginu 5,62. Hluthafar skulu tilkynna félaginu vilja sinn í þessum efnum fyrir lok dags þann 3. apríl 2008. Sérstakur reitur verður opnaður á heimasíðu SPRON hf. www.spron.is í þessu skyni. Þeir sem ekki óska eftir hlutum í SPRON hf. fá arðinn greiddan í reiðufé þann 10. apríl 2008. 2. Tillaga til breytinga á samþykktum félagsins Nýr málsliður komi í 1. mgr. 13. gr. samþykkta SPRON hf. og verði sá næst síðasti, svohljóðandi: "Gildir það hvort sem yfirráð yfir atkvæðisrétti byggjast á beinni eða óbeinni eignarhlutdeild." 3. Tillaga stjórnar um starfskjarastefnu félagsins Starfskjarastefna SPRON hf. er sett með það að markmiði að halda í og laða að hæfa og metnaðarfulla stjórnendur og starfsmenn. SPRON hf. byggir samkeppnishæfni sína á ábyrgum og hæfum starfsmönnum. Leitast félagið við að bjóða gott starfsumhverfi, þar með talin starfskjör, til að gera SPRON hf. að eftirsóknarverðum valkosti á vinnumarkaði. Stjórn SPRON hf. hefur samþykkt eftirgreinda starfskjarastefnu fyrir félagið skv. 79. gr. laga nr. 2/1995 um hlutafélög og almenn viðmið atvinnulífsins um góða stjórnarhætti. 1.Stjórn SPRON hf. mun skipa sérstaka starfskjaranefnd til ráðgjafar fyrir stjórn varðandi starfskjör forstjóra. Hlutverk nefndarinnar verður að leggja drög að samningi við forstjóra um laun og önnur starfskjör og móta stefnu um kjaratengd málefni félagsins s.s. árangurstengingu launa og kauprétti að hlutabréfum í félaginu. Starfskjaranefnd skal taka starfskjarastefnu SPRON hf. til endurskoðunar árlega og leggja fyrir aðalfund félagsins til samþykktar. Starfskjör stjórnarmanna eru ákveðin á aðalfundi félagsins ár hvert. 2.Við ákvörðun um starfskjör forstjóra skal horfa til launakjara í sambærilegum störfum á fjármálamarkaði og taka mið af menntun, reynslu og fyrri störfum. Gera skal skriflegan ráðningarsamning við forstjóra og skulu þar koma fram starfskjör umfram grunnlaun, s.s. kaupréttur, greiðslur í lífeyrissjóð, hlunnindi og uppsagnarfrestur. Forstjóri semur um starfskjör við framkvæmdastjóra og aðra stjórnendur móðurfélagsins, svo sem um kaupaukagreiðslur, lífeyrisframlag og hlunnindi. Við ákvörðun launa stjórnenda skal taka mið af umfangi og ábyrgð starfsins, ásamt frammistöðu og framtíðarmöguleikum stjórnandans innan fyrirtækisins. Ákvörðun um starfskjör framkvæmdastjóra dótturfélaga eru í höndum stjórnar viðkomandi dótturfélags. Við starfslok stjórnenda skulu greiðslur að jafnaði byggjast á ráðningarsamningi viðkomandi. 3.Kaupréttaráætlun SPRON hf. gerir ráð fyrir að allir fastir starfsmenn félagsins hafi kost á að fjárfesta í hlutum í félaginu. Kaupréttaráætlunin nær til starfsmanna móðurfélagsins og dótturfélaga innan samstæðunnar. Með eignarhaldi á hlutum í félaginu er talinn skapast aukinn hvati hjá starfsmönnum til að stuðla enn betur að áframhaldandi vexti og árangri þess. Kaupréttaráætlunin er gerð til þriggja ára. Starfsmenn eiga kost á að fjármagna kaup á hlutum í félaginu með lánum sem veitt verða í samræmi við almennar reglur um útlán SPRON hf. Kaupréttir geta í heild numið allt að 4% af útgefnu hlutafé SPRON hf. á hverjum tíma. 4.Starfskjarastefnan er bindandi fyrir stjórn SPRON hf. að því er varðar ákvæði um kaupréttarsamninga og aðra samninga eða greiðslur sem fylgja þróun verðs á hlutabréfum í félaginu, skv. 79 gr. laga um hlutafélög 2/1995. Að öðru leyti er starfskjarastefnan leiðbeinandi fyrir stjórn SPRON hf. Ef vikið er frá starfskjarastefnunni í veigamiklum atriðum skulu frávik færð í gerðarbók stjórnar ásamt rökstuðningi. Greina skal frá slíkum frávikum á næsta aðalfundi félagsins. Stefnan var fyrst samþykkt á hluthafafundi SPRON hf. 21. ágúst 2007 og er nú lögð óbreytt fyrir aðalfund SPRON hf. 27. febrúar 2008 til staðfestingar. 4. Kosning endurskoðanda Stjórn SPRON leggur til að endurskoðunarstofan KPMG endurskoðun hf., verði fengin til að sjá um endurskoðun fyrir fyrirtækið starfsárið 2008. 5. Ákvörðun um þóknun stjórnar fyrir næsta kjörtímabil Stjórn SPRON leggur til að laun hvers stjórnarmanns verði kr. 200.000 á mánuði. Formaður skal hafa tvöföld laun stjórnarmanns. 6. Tillaga um kaup á eigin hlutum Stjórn hefur heimild til þess að kaupa eigin hluti í félaginu eða taka þá að veði. Heimild þessi standi í 18 mánuði og takmarkist við að samanlögð kaup og veðsetning hluta fari ekki yfir 10% af heildarhlutafé félagsins á hverjum tíma. Kaupverð hluta skal vera lægst 10% lægra og hæst 10% hærra, en skráð kaup- og sölugengi í Kauphöll Íslands.
Leiðrétting: - Dagskrá og tillögur fyrir aðalfund SPRON 2008 - Frétt birt 19.02.2008
| Source: SPRON