Alfesca hefur gengið frá kaupum á ítalska matvælabirgjanum D&F S.r.l (D&F) af stofnendum fyrirtækisins. D&F er leiðandi birgir og dreifingaraðili matvæla á ítalska matvörumarkaðnum og hefur fram að þessu verið helsti dreifingaraðili fyrir vörur Alfesca á Ítalíu. Alfesca hefur á undanförnum árum aukið mjög sölu á sjávarafurðum, andalifrarkæfu og andakjöti á Ítalíu og náð fótfestu á ört vaxandi markaði fyrir hátíðarrétti og matvæli sem eru holl og einföld í framreiðslu. Kaupin á D&F munu styrkja stöðu Alfesca en betri aðgangur að ítalska markaðnum mun hraða framþróun félagsins. Starfsmenn D&F eru tólf talsins og nemur ársvelta um €8,8 milljónum. Kaupverð er ekki gefið upp. Kaupin voru fjármögnuð með eigin fjármunum Alfesca og munu þau ekki hafa teljandi áhrif á rekstrarniðurstöður félagsins. D&F verður áfram rekið af sama stjórnendateymi og verið hefur og verður með í samstæðuuppgjöri Alfesca frá kaupdegi. Xavier Govare, forstjóri Alfesca: „Með því að sameina dreifigetu og sambönd D&F annars vegar og markaðsþekkingu og framleiðslukunnáttu Alfesca hins vegar verður okkur kleift að þróa frekar viðskiptin á hinum vaxandi ítalska markaði. Með leiðandi stöðu Alfesca í sínum vöruflokkum og sterkri stöðu D&F sem dreifingaraðila skapast traustur grundvöllur til að bjóða ítölskum viðskiptavinum breiða vörulínu af sjávarafurðum undir vörumerkjum Alfesca; Labeyrie, Farne og Delpierre. Kaupin á D&F uppfylla þau skilyrði sem við gerum við yfirtökur og standast fjárhagslegar kröfur okkar. Þau styðja við sölu á vörumerkjum Alfesca og gefa okkur fullan aðgang að landfræðilega nýjum markaði í hröðum vexti Við bjóðum starfsmenn D&F hjartanlega velkomna til Alfesca-samstæðunnar og hlökkum til að þróa áfram viðskipti okkar á Ítalíu.“ Nánari upplýsingar veita: Antony Hovanessian, framkvæmdastjóri viðskiptaþróunar +33 (0) 5 58 56 74 74 ah@alfesca.com Hrefna Ingólfsdóttir, forstöðumaður samskiptasviðs +354 477 7000 hi@alfesca.com Um Alfesca Alfesca er í fremstu röð matvælaframleiðenda í Evrópu á þeim sviðum sem fyrirtækið starfar. Megin stoðirnar í starfsemi félagsins eru fjórar: reyktur lax og annar fiskur, andalifur (foie gras) og andakjöt, rækjur og annar skelfiskur og pönnukökur (blini) og smurvörur ásamt ídýfum. Vörur fyrirtækisins eru seldar undir vörumerkjum þess eins og Labeyrie, Blini, Delpierre, Skandia, Lyons og Farne. Fyrirtækið framleiðir einnig töluvert fyrir vörumerki annarra einkum í Bretlandi, Frakklandi og Spáni. Árleg velta er um 616 milljónir Evra og starfsmenn eru um 3,500 Alfesca er skráð í Norrænu OMX-kauphöllinni á Íslandi (OMXI: A). Upplýsingar um Alfesca er að finna á www.alfesca.com. Fréttatilkynning þessi er birt á bæði ensku og íslensku. Ef um misræmi er að ræða gildir enski textinn.