Skuldabréfaútboði að andvirði 6 milljarða króna lokið - Hlutafjárútboð er fyrirhugað 5. og 6. júní og miðast hluthafaskrá við lok viðskipta 28. maí 2008

Skuldabréfaútboði Marel Food Systems hf. sem fram fór dagana 22. og 23. maí
síðastliðinn er lokið. Seld voru skuldabréf að andvirði 6 milljarða króna (€ 52
milljónir). Verðbréfamiðlun Landsbanka Íslands hf. hafði umsjón með sölu
skuldabréfanna. 

Marel Food Systems hf. stefnir að því að hlutafjárútboð félagsins fari fram
fimmtudaginn 5. og föstudaginn 6. júní n.k. og ljúki kl. 16:00 þann dag. 
Þeir hluthafar Marel Food Systems hf. sem heimild munu hafa til að taka þátt í
hlutafjárútboðinu þurfa að vera skráðir í hluthafaskrá félagsins í lok dags 2.
júní. Að teknu tilliti til uppgjörsreglna á íslenskum hlutabréfamarkaði (T+3) 
þurfa síðustu viðskipti með hluti í félaginu að eiga sér stað fyrir lok dags
miðvikudaginn 28. maí n.k. vilji aðilar eiga þátttökurétt í þessum hluta
útboðsins. 

Auk hluthafa munu þeir fjárfestar sem þess óska sérstaklega geta skráð sig
fyrir hlutum í útboði Marel Food Systems hf. enda skrái þeir sig fyrir a.m.k.
75.000 hlutum í félaginu. 

Boðnir verða út nýir hlutir í Marel Food Systems hf. að söluverðmæti € 117
milljónir. Stjórn Marel Food Systems hf. hefur áskilið sér rétt til þess að
fjölga þeim hlutum sem boðnir verða til sölu í útboðinu þannig að söluandvirði
þeirra verði allt að € 147 milljónir, verði umframeftirspurn í útboðinu. Fjöldi
hluta sem seldir verða í útboði Marel Food Systems hf. ræðst af gengi evru
gagnvart íslenskri krónu og útboðsgengi. Tilkynnt verður um fjölda hluta sem
boðnir verða til sölu og útboðsgengi í kjölfar stjórnarfundar í Marel Food
Systems hf. sem haldinn verður þann 3. júní 2008. 

Fyrirtækjaráðgjöf Landsbanka Íslands hf. hefur umsjón með hlutafjárútboðinu.