Góð afkoma á rekstri Lánasjóðs sveitarfélaga ohf.
Lánasjóður sveitarfélaga ohf. er lánafyrirtæki og starfar eftir lögum um
fjármálafyrirtæki undir eftirliti Fjármálaeftirlitsins (FME). Helstu
niðurstöður úr ársreikningum sjóðsins í m.kr. eru:
Rekstur ársins 2008 2007 2006 2005*
Hreinar vaxtatekjur 2.721 1.385 1.138 725
Aðrar rekstrartekjur (gjöld) (1.390) (97) 121 16
Almennur rekstrarkostnaður 106 70 64 52
Hagnaður ársins 1.225 1.219 1.195 688,9
Efnahagur 31. desember 2008 2007 2006 2005*
Útlán 60.358 39.267 31.692 22.540
Aðrar eignir 3.598 2.466 2.275 1.388
Lántökur 51.026 29.255 21.957 13.218
Aðrar skuldir 1.657 2.430 3.181 39
Eigið fé 11.273 10.048 8.829 10.670
CAD-hlutfall 57%** 112% 120% 221%
*) Uppgjör fyrir 2005 er samkvæmt eldri reikningsskilaaðferðum.
**) Árið 2008 er CAD-hlutfall reiknað miðað við Basel II en var reiknað miðað
við Basel I hin árin.
Afkoma 2008
Tekjuafgangur 2008 var 1.225 m.kr. á móti 1.219 m.kr. árið áður. Afkoma 2008
hefði verið mun betri ef ekki hefði komið til niðurfærslu að verðmæti 1.472
milljónir króna vegna afleiðusamninga sem sjóðurinn hafði gert við Glitni
banka. Háir vextir á innlendum markaði svo og mikil verðbólga skiluðu mjög
góðri afkomu en eignir sem samsvara eigin fé sjóðsins eru að mestu bundnar í
verðtryggðum útlánum. Ávöxtun á lausu fé var einnig framúrskarandi, en mestur
hluti þess var varðveittur í Seðlabankanum.
Meginhlutverk sjóðsins er að tryggja sveitarfélögum, stofnunum þeirra og
fyrirtækjum lánsfé á hagstæðum kjörum. Útborguð langtímalán á árinu 2008 voru
15.505 m.kr. miðað við 4.047 m.kr. á fyrra ári. Skammtímalánveitingar sjóðsins
námu hinsvegar 6.158 m.kr. á árinu en voru 5.840 m.kr. á fyrra ári. Aðstæður
til töku langtímalána, bæði verðtryggðra og gengistryggðra, voru einstaklega
óhagstæðar á árinu. Mikil aukning varð í eftirspurn eftir lánum hjá sjóðnum
eftir fall bankanna og tókst sjóðnum að bregðast skjótt við og veita mikið af
lánum á síðustu mánuðum ársins. Þar eiga lífeyrissjóðir landsins mikinn þátt
sem þátttakendur í skuldabréfaútboðum sjóðsins.
Sjóðurinn hefur ekki tapað útláni frá því að hann hóf starfsemi árið 1967 og
engin vanskil voru í árslok 2008. Sveitarfélögin bera ekki ábyrgð á
skuldbindingum sjóðsins, en tryggingar fyrir útlánum hans eru í tekjum
sveitarfélaga skv. 3. mgr. 73. gr. sveitarstjórnarlaga nr. 45/1998, sbr. einnig
reglugerð um tryggingar Lánasjóðs sveitarfélaga í tekjum sveitarfélags nr.
123/2006.
Eigið fé í árslok 2008 var 11.273 m.kr. á móti 10.048 m.kr. árið áður. Vegið
eiginfjárhlutfall, svonefnt CAD-hlutfall, var í árslok 2008 57% en var 112% í
árslok 2007, en þarf að vera 8% skv. lögum um fjármálafyrirtæki.
Framtíðarhorfur
Gert er ráð fyrir að afkoma sjóðsins á árinu 2009 verði svipuð og árin 2008 og
2007. Aðstæður á lánsfjármörkuðum munu þó hafa úrslitaáhrif á möguleika
sjóðsins til að koma til móts við lánsfjárþörf sveitarfélaganna á árinu. Allt
kapp verður lagt á að tryggja lánshæfi sjóðsins og viðhalda því trausti sem
fjárfestar hafa á skuldbindingum hans.
Lánasjóðurinn mun að öðru leyti starfa í meginatriðum líkt og undanfarin ár þar
sem stefnt hefur verið að eflingu á starfsemi hans og aukinni þjónustu við
sveitarfélögin með því að nýta gott lánstraust sjóðsins til að útvega
sveitarfélögunum lánsfé á hagstæðum kjörum.
Nánari upplýsingar veitir: Óttar Guðjónsson, framkvæmdastjóri, s. 515 4900.
