Stjórn Actavis hefur ákveðið að ljúka viðræðum vegna hugsanlegra kaupa félagsins á samheitalyfjasviði lyfjafyrirtækisins Merck. Actavis hefur framkvæmt ítarlega áreiðanleikakönnun á Merck og skilgreint fjölmörg áhugaverð samlegðartækifæri með félögunum. Hinsvegar telur stjórn Actavis að það verð sem talið er að samkeppnisaðilar hafi boðið í félagið, vera orðið mun hærra en svo að það þjóni hagsmunum hluthafa félagsins að halda áfram samningaviðræðum. Róbert Wessman, forstjóri Actavis: „Við teljum að samruni Actavis og samheitalyfjasviðs Merck hefði getað verið áhugaverður. Við höfum hinsvegar mótað okkur skýra stefnu um að greiða ekki of hátt verð fyrir þau félög sem við fjárfestum í og með hagsmuni hluthafa að leiðarljósi var viðræðum okkar slitið. Áherslur okkar munu áfram beinast að því að efla undirliggjandi starfsemi félagsins og ná metnaðarfullum markmiðum okkar fyrir árið. Við teljum framtíðarmöguleika félagsins til áframhaldandi vaxtar og arðsemi sérlega góða og munum áfram leita leiða til að styrkja stöðu Actavis í hópi öflugustu samheitalyfjafyrirtækja heims.” Nánari upplýsingar veitir: Halldór Kristmannsson Innri og ytri samskipti Sími 535 2325 / 840 3425 Póstfang: hkristmannsson@actavis.com Um Actavis Actavis er alþjóðlegt lyfjafyrirtæki sem sérhæfir sig í þróun, framleiðslu og sölu samheitalyfja. Hjá Actavis starfa meira en 11,000 manns í yfir 30 löndum. Höfuðstöðvar félagsins eru á Íslandi en fyrirtækið rekur auk þess þróunarsetur og verksmiðjur í Evrópu, Bandaríkjunum og Asíu. Almennur lagafyrirvari Upplýsingar, sem fram koma í þessari fréttatilkynningu, kunna að innihalda forspár varðandi fjárhagsstöðu, árangur og viðskipti Actavis. Forspár og áætlanir eru í eðli sínu tengdar áhættu og óvissu þar sem þær varða atvik og eru háðar atburðum sem munu eiga sér stað í framtíðinni. Ýmsir þættir geta leitt til þess að raunverulegur árangur eða þróun verði í veigamiklum atriðum frábrugðin því sem fram kemur eða er undanskilið í þessum forspám. Þessir þættir eru m.a. gengissveiflur, sú hætta að rannsóknir og þróun muni ekki skila af sér vörum sem nái viðskiptalegum árangri, áhrif samkeppni, verðstýring og verðlækkanir, hættan á að missa einkaleyfi eða vörumerkjaréttindi eða að þau renni út, erfiðleikar við að fá eða viðhalda opinberum leyfum fyrir vörur, hættan á verulegum skaðsemisábyrgðarkröfum eða hætta á ábyrgð vegna umhverfistjóns.