Novator, félag í eigu stjórnarformanns Actavis, Björgólfs Thors Björgólfssonar, hefur í dag sent út tilkynningu þess efnis að félagið muni birta hluthöfum í Actavis nýtt yfirtökutilboð. Tilboðið verður lagt fram í evrum og hljóðar upp á 1,075 evrur á hlut í reiðufé og boðið hluthöfum í A flokki. Tilboðið er 19,6% hærra en gengi bréfa Actavis daginn áður en Novator tilkynnti um tilboð sitt, sem síðan var formlega birt hluthöfum þann 1.júní. Þá er tilboðið 10,6% hærra en fyrra tilboð Novator, sem var 0,98 evrur á hlut. Viðbótargreiðsla til hluthafa Samkvæmt tilboði Novator munu þeir hluthafar sem samþykkja tilboðið fá aukagreiðslu ef Novator skyldi ákveða að selja 10% eða meira af hlut sínum í Actavis innan 12 mánaða, frá því að tilboðstíma lýkur. Nánari upplýsingar um hugsanlega viðbótargreiðslu til hluthafa má finna í tilboðslýsingu Novator. Stjórn Actavis mælir með tilboðinu Eftir nána samvinnu við óháðan ráðgjafa stjórnarinnar, JP Morgan, er niðurstaða stjórnarinnar sú að nýtt tilboð Novator sé áhugavert fyrir hluthafa félagsins og það því samdóma álit stjórnarinnar að mæla með tilboðinu. JP Morgan gerði óháð mat á tilboðinu að beiðni stjórnarinnar og komst bankinn að þeirri niðurstöðu að nýtt tilboð Novator væri sanngjarnt og ráðlagði stjórninni að mæla með því. Í samræmi við 41. grein laga um verðbréfaviðskipti frá árinu 2003 hefur jafnframt verið horft til fleiri þátta en þess verðs sem boðið hefur verið fyrir hluti í félaginu, s.s. fjármögnunar tilboðs, framtíðaráætlana og viðhorfs til stjórnenda, sem tilboðsgjafi gerir formlega grein fyrir í tilboði sínu. Þeir stjórnarmenn sem lögðu mat á tilboðið eru Sindri Sindrason, Magnús Þorsteinsson og Baldur Guðnason. Sindri Sindrason, stjórnarmaður í Actavis, um álit stjórnarinnar: „Allt frá því að tilboð Novator var fyrst lagt fyrir hluthafa hefur stjórn félagsins lagt mikla áherslu á að standa faglega að mati sínu. Við höfum eytt talsverðum tíma undanfarnar vikur í skoðun á tilboðinu og átt í viðræðum við Novator, sem ég tel að hafi skilað góðum árangri. Talsverð hækkun er frá fyrra tilboði Novators og teljum við jákvætt fyrir hluthafa að fá hugsanlega viðbótargreiðslu ef Actavis verður selt á hærra verði á næstu 12 mánuðum. Þá er niðurstaða okkar í fullu samræmi við mat JP Morgan.“ Kynningarfundur fyrir fjárfesta Stjórn Actavis boðar til opins kynningarfundar fyrir fjárfesta og greiningaraðila í höfuðstöðvum félagsins, Dalshrauni 1, Hafnarfirði í dag kl. 16.30. Á fundinum mun Sindri Sindrason, stjórnarmaður í Actavis og ráðgjafar frá JP Morgan gera grein fyrir áliti stjórnarinnar og svara spurningum. Frekari upplýsingar veita: Sindri Sindrason, stjórnarmaður í Actavis (+354) 892-4481 Halldór Kristmannsson Innri og ytri samskipti Actavis Sími: 550 3300 / 840 3425 hkristmannsson@actavis.com