Þann 10. maí 2007 tilkynnti Novator, félag í eigu Björgólfs Thors Björgólfssonar, til OMX Nordic Exchange á Íslandi, að félagið hefði ákveðið að gera yfirtökutilboð í gegnum nýstofnað eignarhaldsfélag, Novator eignarhaldsfélag ehf. (hér eftir nefnt „tilboðsgjafi”), í allt hlutafé Actavis Group hf. í A-flokki sem ekki var þegar í eigu félaga tengdum tilboðsgjafa eða í eigu Actavis Group hf. Félög tengd tilboðsgjafa eiga alls 1.296.379.823 hluti í A-flokki hlutafjár Actavis Group hf., sem nemur um 38,5% af útgefnu hlutafé í A-flokki og atkvæðisrétti í Actavis Group hf. Þann 1. júní 2007 lagði tilboðsgjafi fram valfrjálst tilboð í samræmi við 38. gr. laga um verðbréfaviðskipti nr. 33/2003 (hér eftir „VVL”). Skilmálar og skilyrði tilboðsins komu fram í opinberu tilboðsyfirliti sem sent var til hluthafa Actavis (hér eftir nefnt „tilboðsyfirlitið”). Tilboðsgjafi tilkynnir hér með að hann hefur ákveðið að leggja fram hagstæðara tilboð í samræmi við 44. gr. VVL sem er háð sömu skilmálum og skilyrðum sem komu fram í tilboðsyfirlitinu (hér eftir „hið breytta tilboð”). Tilboðinu er breytt á eftirfarandi hátt: • Tilboðsverðið hefur verið hækkað og er nú EUR 1,075 (Evrur ein 075/1000) í reiðufé fyrir hvern hlut í A-flokki, sem ekki er í eigu tilboðsgjafa eða tengdra félaga eða Actavis (hér eftir nefnt „hið breytta tilboðsverð”), sem stendur fyrir hækkun á u.þ.b. 10% frá upprunalegu tilboðsverði. • Hugsanleg viðbótargreiðsla verður greidd í reiðufé til hluthafa Actavis Group hf. sem samþykkt hafa hið breytta tilboð fyrir hvern útgefinn hlut í A flokki sem ekki er í eigu tilboðsgjafa eða tengdra félaga eða Actavis á þeim skilmálum sem koma fram hér að neðan. Hið breytta tilboð er háð eftirfarandi skilmálum (til viðbótar þeim skilmálum sem settir eru fram í tilboðsyfirlitinu): • Einróma meðmæli óháðra stjórnarmanna Actavis til hluthafa Actavis um að samþykkja hið breytta tilboð. • Óafturkallanlegri skuldbindingu frá hinum sjálfstæðu stjórnarmönnum Actavis um að samþykkja hið breytta tilboð. Helstu skilyrði fyrir viðbótargreiðslu Komi til þess á næstu 12 mánuðum eftir að yfirtökutilboð tilboðsgjafa verður óskilyrt, að tilboðsgjafi selji eða framselji með öðrum hætti, beint eða óbeint, í einum eða fleirum viðskiptum (þ.m.t. veiting áskriftarréttinda eða valrétta, samruna, sala verulegra eigna, skráning hlutafjár á skipulagðan verðbréfamarkað eða með öðrum hætti), 10% eða meira af hlutafjáreign sinni (eða beinum eða óbeinum réttindum henni tengd), að undanskildum starfsmönnum Actavis Group hf., endurskipulagningu innan samstæðu tilboðsgjafa og öllum kvöðum sem kunna að vera lagðar á hlutabréfin, þ.m.t. veðsetning (á þeim tíma er yfirtökutilboðið verður óskilyrt), í Actavis Group hf. (eða aðila sem tekið hefur við réttindum og skyldum Actavis Group hf.) til ótengds þriðja aðila („síðari sala“), á hærra verði en sem nemur tilboðsverði tilboðsgjafa (hið „hærra söluverð“), þá skuldbindur tilboðsgjafi sig til að tilkynna öllum þeim er samþykkja yfirtökutilboð tilboðsgjafa um að síðari sala hafi átt sér stað, innan 5 viðskiptadaga eftir að samningar um síðari sölu hafa náðst. Eftir því sem við á mun tilboðsgjafi deila hlutfallslega með hluthöfum sem samþykktu yfirtökutilboðið mismun á hinu hærra söluverði og tilboðsverði (að teknu tilliti til sanngjarns kostnaðar af viðskiptunum). Greiðsla á grundvelli þessa yrði innt af hendi til viðkomandi hluthafa í reiðufé í Evrum innan 10 viðskiptadaga frá lokum síðari sölu. Komi til þess að einhver af þeim hluthöfum sem samþykkt hafa yfirtökutilboð tilboðsgjafa hafi uppi ágreining um viðbótargreiðslu innan 28 daga frá því að slík greiðsla var innt af hendi, skal sú fjárhæð vera ákveðin af einni af fjórum stærstu alþjóðlegu endurskoðendafirmum sem skal byggja á þeirri aðferðafræði sem viðkomandi firma telur sanngjarnt („endurskoðuð fjárhæð”). Slíkt firma, sem skal vera tilnefnt af og vera á reikning tilboðsgjafa, skal upplýsa þá hluthafa sem samþykktu yfirtökutilboðið um hina endurskoðuðu fjárhæð og skal sú ákvörðun vera skuldbindandi fyrir tilboðsgjafa og alla hluthafa sem samþykktu yfirtökutilboðið. Ef hin endurskoðaða fjárhæð er hærri heldur en viðbótargreiðslan skal Novator greiða mismuninn í reiðufé í Evrum hlutfallslega til hvers hluthafa sem samþykkti yfirtökutilboðið innan 10 viðskiptadaga frá slíkri ákvörðun.