Með lögum nr. 125/2008 var Íbúðalánasjóði heimilað að kaupa skuldabréf af fjármálafyrirtækjum sem tryggð eru með veði í íbúðarhúsnæði. Í framhaldi af setningu laganna setti félagsmálaráðherra reglugerð nr. 1081/2008 um þessi fyrirhuguðu kaup. Þar kemur fram að endurgreiðslur fyrir skuldabréfin skuli að jafnaði vera í formi íbúðabréfa. Í 2. gr. reglugerðar nr. 1081/2008 kemur fram að forsenda þess að Íbúðalánasjóður gangi til samninga við fjármálastofnun um kaup á skuldabréfum sem tryggð eru með veði í íbúðarhúsnæði sé að viðkomandi fjármálastofnun hafi fyrst óskað eftir slíkum samningum. Á fundi sínum 8. janúar s.l. samþykkti stjórn Íbúðalánasjóðs reglur um kaup á skuldabréfum fjármálafyrirtækja og hefur félagsmálaráðherra staðfest þær reglur og þær verið birtar í Stjórnartíðindum. Nokkrar umsóknir hafa nú þegar borist til Íbúðalánasjóðs vegna slíkra kaupa en óljóst er á þessari stundu hver heildarfjárhæð kaupanna verður. Vegna þessara fyrirhugaðra kaupa gerði Íbúðalánasjóður, við gerð fjárlaga fyrir árið 2009, tillögu um að hann fái heimildir til útgáfu íbúðabréfa til kaupa á skuldabréfum fyrir allt að 100 milljarða króna í þessu skyni. Var í greinargerð með fjárlagatillögum Íbúðalánasjóðs gerður fyrirvari við þessa fjárhæð þar sem nokkur óvissa ríkir um heildarfjárhæð skuldabréfa sem Íbúðalánasjóði kunna að vera boðin til kaups. Því er ljóst að kaupin geta orðið minni eða meiri en fjárlögin gera ráð fyrir. Íbúðalánasjóður vinnur nú að því að ganga frá samningum vegna þeirra umsókna sem þegar hafa borist sjóðnum og munu upplýsingar þess efnis verða tilkynntar til markaðsaðila þegar þær liggja fyrir.
Fyrirhuguð kaup Íbúðalánasjóðs á skuldabréfum fjármálafyrirtækja sem tryggð eru með veði í íbúðarhúsnæði
| Source: ÍL-sjóður