• Rekstrartekjur fyrri árshelmings voru 56,7 m€, en voru 62,9 m€ árið áður
• EBITDA var 12,9 m€ (22,8%), en var 13,0 m€ (20,6%) árið áður
• Hagnaður tímabilsins var 6,0 m€, en var 10,8 m€ árið áður
Sjá töflu í viðhengi.
Rekstur fyrstu sex mánaða ársins 2009
Rekstrartekjur HB Granda hf. á fyrri helmingi ársins 2009 námu 56,7 m€,
samanborið við 62,9 m€ árið áður. Lækkun tekna á milli ára skýrist einkum af
lægri afurðaverðum í erlendri mynt og loðnuvertíðarbresti, sem þó var að hluta
veginn upp af aukinni veiði á norsk-íslenskri síld, makríl og gulldeplu.
Rekstrarhagnaður fyrir afskriftir (EBITDA) var 12,9 m€ eða 22,8% af
rekstrartekjum, en var 13,0 m€ eða 20,6% árið áður. Hærra EBITDA hlutfall
skýrist m.a. af veikingu krónunnar. Áhrif fjáreignatekna og fjármagnsgjalda
voru jákvæð um 0,3 m€. Á sama tíma árið áður voru áhrif fjáreignatekna og
fjármagnsgjalda samtals neikvæð um 5,5 m€. Meginskýringin á mun á milli ára er
að gengismunur og verðbætur voru í ár jákvæð um 3,3 m€ vegna gengisbreytinga
mynta gagnvart evru, en í fyrra voru þessir liðir neikvæðir um 1,5 m€. Áhrif
hlutdeildarfélaga voru neikvæð um 1,6 m€, einkum vegna taps af fiskeldi í Síle.
Hagnaður fyrir tekjuskatt var 6,3 m€, en hagnaður tímabilsins var 6,0 m€.
Tekjuskattur er reiknaður samkvæmt framtali í íslenskum krónum og er því, vegna
gengisbreytinga, ekki í réttu hlutfalli við afkomu í evrum. Hagnaður fyrri
helmings ársins 2008 fyrir tekjuskatt var 1,7 m€. Hagnaður tímabilsins varð þá
10,8 m€, enda reiknaðist tekjuskattur þá til tekna upp á 9,1 m€ vegna
gengistaps í íslensku skattframtali.
Efnahagur
Heildareignir félagsins námu 287,8 m€ í lok júní 2009. Þar af voru
fastafjármunir 248,5 m€ og veltufjármunir 39,3 m€. Eigið fé nam 125,9 m€ og
var eiginfjárhlutfall 44,1%, en var 41,3% í lok árs 2008. Heildarskuldir
félagsins voru í júnílok 161,9 m€.
Sjóðstreymi
Handbært fé frá rekstri nam 13,0 m€ á fyrri helmingi ársins 2009, en 8,2 m€ á
sama tíma fyrra árs. Fjárfestingahreyfingar námu 6,0 m€ og var stærsti hluti
þeirra tengdur uppbyggingu nýrrar fiskmjölsverksmiðju á Vopnafirði.
Fjármögnunarhreyfingar námu 8,2 m€ og voru nettó afborganir langtímalána þar af
7,4 m€. Handbært fé lækkaði því um 1,2 m€ og var í lok júní 5,2 m€.
Skipastóll og afli
Í skipastól HB Granda hf. eru 5 frystitogarar, 3 ísfisktogarar og 4
uppsjávarfiskveiðiskip.
Á fyrri helmingi ársins 2009 var afli skipa félagsins 25 þúsund tonn af
botnfiski og 45 þúsund tonn af uppsjávarfiski.
