Leiðrétting: Upplýsingar um arðsréttindadag. Tilkynning birt í heild sinni að nýju.
Eins og fram kemur í tillögum stjórnar Marel hf. til aðalfundar félagins árið 2012 er lagt til að greiddur verði út arður til hluthafa vegna reikningsársins 2011 sem nemur 0,95 evru sentum á hlut, en slík arðgreiðsla samsvarar u.þ.b. 20% af hagnaði ársins.
Fyrirhuguð heildararðgreiðsla nemur um 6,9 milljónum evra, miðað við núverandi fjölda útistandandi hluta.
Samþykki aðalfundur tillöguna, yrði arðsréttindadagur (e. record date) þann 5. mars 2012. Hluthafar tilgreindir í hlutaskrá félagsins í lok arðsréttindadags eiga tilkall til arðs.
Arðleysisdagur (e. ex-date), það er sá dagur sem viðskipti hefjast með bréf félagsins án réttar til arðs vegna reikningsársins 2011, yrði þá 1. mars 2012, daginn eftir aðalfund.
Félagið vekur sérstaka athygli á því, að fallist hluthafar á argreiðslutillöguna verður arðurinn greiddur út í krónum (ISK) en þeir hluthafar sem óska hins vegar eftir arðgreiðslu í evrum (EUR) skulu tilkynna félaginu um slíkt með tölvupósti á netfangið dividends@marel.com, eigi síðar en 7. mars 2012. Í tilkynningunni skal hluthafi jafnframt veita upplýsingar um viðeigandi EUR reikning (þ.m.t. IBAN númer, SWIFT kóða og heimilisfang reikningseiganda), svo unnt sé að greiða arðinn án vandkvæða. Gerð er krafa um að EUR reikningur þessi sé á nafni viðkomandi hluthafa.
Hvað erlenda hluthafa varðar, gengur félagið út frá því að óskað verði eftir arðgreiðslu í EUR, nema félaginu verði tilkynnt um annað.
Við útreikning á fjárhæð arðgreiðslu verður miðað við miðgengi hins skráða opinbera viðmiðunargengis Seðlabanka Íslands kl. 11:00 á aðalfundardegi (http://sedlabanki.is/?PageID=7).
Lagt er til að útborgunardagur (e. payment date) arðgreiðslu verði þann 14. mars 2012, tveimur vikum eftir aðalfund.
Öllum fyrirspurnum varðandi framangreint og hina fyrirhuguðu arðgreiðslu að öðru leyti skal beint til félagsins í gegnum netfangið dividends@marel.com.