Stjórn Eyris Invest hf. ákvað í dag að gefa út hluti í nýjum B flokki hlutabréfa. Söluverð nýju hlutanna er samtals 2,8 milljarðar króna. Samhliða hlutafjáraukningu hefur Eyrir tryggt sér framlengingu á meginhluta langtímalána með samningum við núverandi viðskiptabanka félagsins. Eftir framlengingu lána eru um 85% af lánum félagsins með gjalddaga höfuðstóls á árunum 2015-2018.
Árni Oddur Þórðarson, forstjóri:
„Það er okkur ánægja að bjóða nýja hluthafa velkomna í hluthafahóp Eyris Invest og jafnframt erum við þakklát fyrir það traust sem við höfum hjá viðskiptabönkum okkar“
Hluthafafundur félagsins heimilaði útgáfu allt að 231.000.000 hluta í B flokki hlutabréfa samanber tilkynningu til Kauphallar 21. desember 2012. Í dag samþykkti stjórn Eyris að gefa út 107.630.769 hluti. Umsamið áskriftarverð á nýjum hlutum er 26 krónur á hlut, heildaráskriftarverð nýju hlutanna er samtals 2.798.999.994 krónur. Hlutabréf í B flokki eru án atkvæðaréttar en njóta forgangs til arðgreiðslna. Hlutabréf í B flokki eru breytanleg í hluti í A hlutabréf hvenær sem er. Útgefnir hlutir í A flokki hlutabréfa eru 1.108.681.220 hlutir, þar af eru eigin hlutir 100.000.000 að nafnvirði.
Arctica Finance er ráðgjafi og umsjónaraðili hlutafjáraukningar félagsins. Kaupendur að nýju hlutunum eru lífeyrissjóðir og fagfjárfestar.
Um Eyrir Invest
Eyrir er alþjóðlegt fjárfestingarfélag sem leggur ríka áherslu á virka þátttöku í rekstri og stefnumörkun lykileigna sinna. Lykileignir Eyris eru 33% hlutur í Marel, 17% eignarhlutur í Fokker Technologies og 17% eignarhlutur í Stork Technical Services. Að auki styður Eyrir Invest fjölmarga sprota til vaxtar. „Kaupa og styðja til vaxtar“ stefna Eyris hefur skilað góðri ávöxtun frá stofnun félagsins.