Eftirfarandi er yfirlit yfir áhrif útbreiðslu COVID-19 á stöðu og starfsemi Arion banka. Yfirlitið nær til aðgerða sem bankinn hefur gripið til að tryggja rekstrarsamfellu bankans með stuðning við viðskiptavini í huga, fjárhagsstöðu bankans og helstu úrræða sem kynnt hafa verið af íslenskum stjórnvöldum.
Helstu aðgerðir til að tryggja daglegan rekstur bankans
- Arion banki starfar í dag eftir viðbragðsáætlun með velferð viðskiptavina og starfsfólks í huga. Öryggisnefnd bankans fundar daglega.
- Til að forðast smit og hefta útbreiðslu COVID-19 hefur deildum og sviðum verið skipt upp í smærri einingar sem ekki mega ekki umgangast aðrar einingar bankans. Þar að auki vinna flestir starfsmenn bankans heima hjá sér. Starfsemi og þjónusta gengur vel og er án röskunar.
- Í útibúum bankans hefur verið lokað fyrir heimsóknir nema þær séu bókaðar fyrir fram og þá einungis fyrir brýn erindi. Viðskiptavinir eru hvattir til að nýta aðrar þjónustuleiðir eins og þjónustuver, Arion appið og netbankann.
Áhrif heimsfaraldursins eru enn mjög óljós en fjárhagsleg staða Arion banka er mjög sterk
- Eiginfjár- og lausafjárstaða samstæðu Arion banka er mjög sterk og er vel umfram kröfur eftirlitsaðila
- Reiknað bráðabirgða eiginfjárhlutfall er í dag 27,8% og reiknað hlutfall eiginfjárþáttar 1 er 22,9% og er þá tekið tilliti til eftirfarandi atriða sem skýra breytingar á hlutföllum frá árslokum 2019:
- Ekki er tekið tillit til fyrirsjáanlegrar arðgreiðslu að fjárhæð 10 milljarða króna
- Tekið er tillit til nýrrar skuldabréfaútgáfu í viðbótar eigin fjár þætti 1 sem var kláruð í febrúar 2020
- Tekið er tillit til nýrra eiginfjárreglna er varða lán til lítilla og meðalstórra fyrirtækja, sem tóku gildi 1. janúar 2020.
- Samsvarandi vogunarhlutfall er 16,3%.
- Eiginfjárkröfur eftirlitsaðila hafa lækkað úr 20,3% í 18,4% vegna afnáms sveiflujöfnunaraukans. Samsvarandi eiginfjárviðmið bankans er 19,4%-20,4% þegar tekið er tillit til stjórnendaaukans.
- Lausafjárhlutfall bankans (LCR) hefur verið umfram 230% frá 15. mars 2020, sem er töluvert hærra en í árslok þegar hlutfallið var 188%. Lækkun Seðlabankans á sérstakri bindiskyldu hækkaði lausafé bankans. Fjármögnunarhlutfall bankans (NSFR) er sterkt (116%) og er vel yfir kröfum eftirlitsaðila.
- Reiknað bráðabirgða eiginfjárhlutfall er í dag 27,8% og reiknað hlutfall eiginfjárþáttar 1 er 22,9% og er þá tekið tilliti til eftirfarandi atriða sem skýra breytingar á hlutföllum frá árslokum 2019:
- Engar verulegar afborgarnir langtímaskulda fyrr en í desember 2021. Ekki er þörf á alþjóðlegri fjármögnun á árinu 2020.
- Ákvörðun um arðgreiðslu hefur verið frestað um tvo mánuði að beiðni hluthafa og bankinn mun ekki fara í frekari kaup á eigin bréfum fyrr en óvissa vegna heimsfaraldursins hefur minnkað. Þessar ákvarðanir eru í samræmi við tilmæli Seðlabankans um að fjármálafyrirtæki endurskoði ákvarðanir um lækkun eiginfjár í ljósi óvissu í efnahagsumhverfinu.
- Bankinn væntir aukningar í niðurfærslu útlána ár árinu 2020 en erfitt er að leggja mat á umfang hennar á þessu stigi. Nokkrir þættir hafa þar áhrif, þ.á.m. umfang heimsfaraldursins og hversu lengi hann muni vara.
- Valitor hefur ákveðið að upplýsa um skuldbindingar sínar vegna ferðaþjónustu, sjá hér.
- Á þessum tímapunkti gerir bankinn ekki ráð fyrir að núverandi staða muni hafa áhrif á fjárhagsleg markmið samstæðunnar næstu 2-3 árin.
- Á aðalfundi Arion banka þann 17. mars fór Benedikt Gíslason bankastjóri ítarlega yfir lánasafn bankans, veðstöðu, hlutfall ferðaþjónustunnar í útlánaáhættu og þróun lánasafnsins undanfarin ár. Kynningu bankastjóra má finna hér.
- Frekari upplýsingar um fjárhagsstöðu Arion banka má finna í ársreikningi bankans 2019, áhættuskýrslu bankans 2019 og árs- og samfélagsskýrslu bankans 2019.
Helstu aðgerðir stjórnvalda
Ríkisstjórn Íslands og Seðlabanki Íslands hafa kynnt fjölda aðgerða til að bregðast við áhrifum COVID-19. Þeirra á meðal eru:
- Seðlabankinn hefur lækkað stýrivexti í 1,75% sem er sögulega lágt.
- Seðlabankinn hefur aflétt 2% kröfu um sveiflujöfnunarauka á fjármálafyrirtæki og verður hann því 0%.
- Seðlabanki Íslands hefur minnkað bindiskyldu innlánsstofnana um helming, eða frá 2% í 1%
- Í undirbúningi er að ríkið veiti 50% ábyrgð á brúarlánum til fyrirtækja í rekstri sem þurfa viðbótarfyrirgreiðslu, að ákveðnum skilyrðum uppfylltum. Gert er ráð fyrir að heildar ábyrgð ríkisins gæti numið 35 milljörðum króna.
- Seðlabankinn mun hefja bein kaup á skuldabréfum ríkissjóðs á eftirmarkaði fyrir allt að 150 milljarða króna.
- Bankaskattur hefur verið lækkaður í 0,145% úr 0,318%.
- Samþykktur hefur verið tímabundinn réttur til atvinnuleysisbóta samhliða minnkuðu starfshlutfalli, um allt að 75%, vegna samdráttar í starfsemi vinnuveitenda, svokölluð hlutastarfaleið. Þetta gerir vinnuveitendum kleift að halda ráðningarsambandi við starfsfólk í gegnum tímabundna erfiðleika.
- Starfsfólk í sóttkví fær greidd laun á meðan á sóttkví stendur.
- Samþykktur hefur verið sérstakur barnabótaauki.
- Einstaklingar geta tekið út séreignarsparnað.
- Útvíkkun á „Allir vinna“ átakinu.
- Fyrirtæki sem lenda í tímabundnum rekstrarvanda geta frestað þremur gjalddögum staðgreiðslu og tryggingargjalds á árinu 2020 fram til ársins 2021.
- Sjá einnig vef Stjórnarráðs Íslands.
Helstu úrræði fyrir viðskiptavini Arion banka
Einstaklingar:
- Bankinn vinnur með viðskiptavinum að finna lausnir á áskorunum sem myndast geta í núverandi aðstæðum. Dæmi um úrræði eru:
- Einstaklingar sem sjá fram á erfiðleika við að standa skil á afborgunum íbúðalána vegna COVID-19 býðst að gera hlé á afborgunum lánanna í allt að þrjá mánuði.
- Skammtíma neytendalán.
- Greiðsludreifing greiðslukorta.
- Frekari upplýsingar er að finna á heimasíðu bankans.
Fyrirtæki:
- Í samræmi við samkomulag fjármálafyrirtækja og lífeyrissjóða geta fyrirtæki nú sótt um greiðslufrest á lánum að ákveðnum skilyrðum uppfylltum.
- Í undirbúningi er að ríkið veiti 50% ábyrgð á brúarlánum, að ákveðnum skilyrðum uppfylltum, til fyrirtækja sem þurfa viðbótarfyrirgreiðslu (sjá nánar í umfjöllun um aðgerðir stjórnvalda).
- Frekari upplýsingar er að finna á heimasíðu bankans.
Vinsamlegast beinið fyrirspurnum til Theodórs Friðbertssonar, forstöðumanns fjárfestatengsla Arion banka, ir@arionbanki.is, s. 856 6760 eða Haraldar Guðna Eiðssonar, forstöðumanns samskiptasviðs, haraldur.eidsson@arionbanki.is, s 856 7108.
Þessar upplýsingar eru birtar í samræmi við upplýsingaskyldu Arion banka hf. skv. reglugerð Evrópusambandsins um markaðssvik (MAR).