Auður Daníelsdóttir, sem sinnt hefur stöðu framkvæmdastjóra sölu- og ráðgjafar hjá Sjóvá, hefur sagt starfi sínu lausu.
Auður hefur starfað hjá Sjóvá frá árinu 2002, sem framkvæmdastjóri starfsmanna- og rekstrarmála, framkvæmdastjóri tjónasviðs og nú síðast sem framkvæmdastjóri sölu og ráðgjafar.
„Á liðnum 19 árum hefur Auður markað djúp spor í rekstri Sjóvár með sínu framlagi. Auður á að baki fjölbreyttan og farsælan feril og hefur tekist á við krefjandi verkefni. Þau hefur hún leyst af hendi með afbrigðum vel enda mikill leiðtogi sem fær samstarfsmenn til að fylgja sér á skýrri og metnaðarfullri vegferð. Það er alltaf gleðiefni þegar einstaklingum býðst að takast á við nýjar áskoranir og byggja ofan á árangursríkan feril sinn. Auði fylgja góðar kveðjur um áframhaldandi gæfuríkt gengi með mikilli virðingu og þakklæti fyrir hennar framlag fyrir Sjóvá“ segir Hermann Björnsson, forstjóri Sjóvá.
Í framhaldi af þessu hefur Sjóvá gert breytingar á skipuriti félagsins sem felast m.a. í því að framkvæmdastjórum félagsins fjölgar um einn. Birgir Viðarsson sem nú gegnir starfi forstöðumanns fyrirtækjaráðgjafar á sölu- og ráðgjafarsviði, verður framkvæmdastjóri sölu og ráðgjafar. Birgir er verkfræðingur að mennt og hóf störf hjá Sjóvá 2011. Svali H. Björgvinsson sem nú gegnir starfi forstöðumanns viðskiptaþróunar og stefnumótunar, verður framkvæmdastjóri markaðsmála og viðskiptaþróunar. Svali er sálfræðingur að mennt og hóf störf hjá Sjóvá 2018.
Frá og með næstu mánaðarmótum verða eftirtalin í framkvæmdastjórn Sjóvá-Almennra trygginga hf., sbr. meðfylgjandi skipurit:
Hermann Björnsson - Forstjóri
Sigríður Vala Halldórsdóttir - Framkvæmdastjóri fjármála og upplýsingatækni
Elín Þórunn Eiríksdóttir - Framkvæmdastjóri tjónaþjónustu
Birgir Viðarsson - Framkvæmdastjóri sölu og ráðgjafar
Svali H. Björgvinsson - Framkvæmdastjóri markaðsmála og viðskiptaþróunar
Viðhengi
