Stjórnendauppgjör félagsins fyrir júlí og ágúst liggja nú fyrir. Afkoma Icelandair í þessum mánuðum endurspeglar góðan árangur í farþega- og leiguflugsstarfsemi félagsins sem skilar töluvert betri rekstrarniðurstöðu en á sama tíma í fyrra. Fraktstarfsemi félagsins hefur hins vegar reynst mjög krefjandi og sá afkomubati sem gert var ráð fyrir við birtingu annars ársfjórðungs hefur ekki skilað sér. Frá sama tíma hefur eldsneytisverð hækkað um tæplega 30%.
Uppfærð afkomuspá fyrir árið 2023 gerir ráð fyrir að heildartekjur verði um 1,5 milljarðar dala og að rekstrarhagnaður (EBIT) verði á bilinu 50-65 milljónir dala sem samsvarar 3,3-4,3% af tekjum. Áfram er gert ráð fyrir hagnaði af rekstri félagsins eftir fjármagnsliði og skatta fyrir árið í heild.
Horfur í farþegaflugi eru góðar og bókunarstaða er sterk það sem eftir lifir árs. Sömuleiðis eru horfur í leiguflugsstarfsemi góðar. Rík áhersla er lögð á að koma fraktstarfseminni aftur í jákvæðan rekstur. Fjárhagsstaða Icelandair er mjög sterk og félagið vel í stakk búið til áframhaldandi arðbærs vaxtar. Þegar hefur verið gengið frá samningum um þrjár farþegavélar til viðbótar í flota félagsins fyrir næsta ár sem munu skapa tækifæri fyrir félagið til að stækka leiðakerfið og auka framboð um í kringum 10% á milli ára.
Uppfærð afkomuspá gerir ráð fyrir að vegið meðalverð á hvert tonn af þotueldsneyti (án tillits til varna) verði 990 USD/tonn út tímabilið. Félagið hefur gert samninga um eldsneytisvarnir sem samsvara um 43% af eldsneytisnotkun frá september til desember á meðalverðinu 864 USD/tonn. Áætlað er að gengi USD á móti íslensku krónunni verði að meðaltali 134 það sem eftir lifir árs.
Tengiliðir:
Fjárfestar: Iris Hulda Thorisdóttir, Director of Investor Relations. E-mail: iris@icelandair.is
Fjölmiðlar: Asdís Petursdóttir, Director of Communications. E-mail: asdis@icelandair.is
