Alvotech (NASDAQ: ALVO) og Íslandbanki hf. hafa gert samning um viðskiptavakt á hlutabréfum Alvotech á Aðalmarkaði Nasdaq Iceland („Kauphöllinni“). Samkvæmt samningnum gefur Íslandsbanki út virk kaup og sölutilboð fyrir hlutabréf í Alvotech á Nasdaq Iceland markaðnum („Kauphöllinni“), fyrir ákveðna lágmarksfjárhæð með föstu bili milli kaup og söluverðs.
Íslandsbanki mun nú birta kaup- og sölutilboð að markaðsvirði 8 milljónir króna hið minnsta, á gengi sem má víkja að hámarki 3% frá síðasta skráðu viðskiptaverði á markaðnum. Bil milli kaup- og sölutilboða tekur mið af verðskrefatöflu Kauphallarinnar og á að haldast sem næst 1,5%, en þó ekki undir 1,45%, nema að breytingar á verðskrefatöflunni krefjist þess. Ef markaðsvirði eigin viðskipta Íslandsbanka með bréf í Alvotech vegna sjálfvirkrar pörunar er meira en 60 milljónir króna innan dags, fellur skylda um hámarksverðbil kaup- og sölutilboða í viðskiptavaktinni niður þann daginn. Ef verðbreyting á bréfum Alvotech innan viðskiptadags nemur meira en 5%, er Íslandsbanka einnig heimilt að tvöfalda hámarksverðbil kaup- og sölutilboða tímabundið þann daginn.
Samningurinn gengur í gildi við upphaf viðskipta föstudaginn 6. október n.k. Hann er ótímabundinn og samningsaðilum er heimilt að setja samningnum upp hvenær sem er á samningstímanum með 14 daga fyrirvara.
Samningar Alvotech við Landsbankann hf. og Arion Banka hf. um viðskiptavakt með hlutabréf félagsins eru jafnframt áfram í gildi.
Um Alvotech
Alvotech, stofnað af Róberti Wessman, er líftæknifyrirtæki sem einbeitir sér að þróun og framleiðslu líftæknihliðstæðulyfja fyrir sjúklinga um allan heim. Alvotech stefnir að því að verða leiðandi fyrirtæki á sviði líftæknihliðstæðulyfja. Til að tryggja hámarksgæði eru allir þættir í þróun og framleiðslu í höndum fyrirtækisins. Alvotech vinnur meðal annars að þróun líftæknilyfjahliðstæða sem nýst geta sjúklingum með sjálfsofnæmis-, augn- og öndunarfærasjúkdóma, beinþynningu eða krabbamein. Alvotech hefur gert samninga um sölu, markaðssetningu og dreifingu við samstarfsaðila á öllum helstu mörkuðum, í Bandaríkjunum, Evrópu, Japan, Kína, öðrum hlutum Asíu, Rómönsku-Ameríku, Afríku og Mið-Austurlöndum. Meðal samstarfsaðila Alvotech eru Teva Pharmaceuticals, dótturfélag Teva Pharmaceutical Industries Ltd. (markaðsaðili í Bandaríkjunum), STADA Arzneimittel AG (Evrópa), Fuji Pharma Co., Ltd (Japan), Advanz Pharma (EES, Bretland, Sviss, Kanada, Ástralía og Nýja Sjáland), Cipla/Cipla Gulf/Cipla Med Pro (Ástralía, Nýja Sjáland, Afríka), JAMP Pharma Corporation (Kanada), Yangtze River Pharmaceutical (Group) Co., Ltd. (Kína), DKSH (Taívan, Hong Kong, Kambódía, Malasía, Singapore, Indonesía, Indland, Bangladess og Pakistan), YAS Holding LLC (Miðausturlönd og Norður Afríka), Abdi Ibrahim (Tyrkland), Kamada Ltd. (KMDA; Ísrael), Mega Labs, Stein, Libbs, Tuteur and Saval (Rómanska-Ameríka) og Lotus Pharmaceuticals Co., Ltd. (Taíland, Víetnam, Filippseyjar og Suður-Kórea).
Alvotech, fjárfestatengsl og samskiptasvið
Benedikt Stefánsson
alvotech.ir@alvotech.com
